МИА
|
|
|
15.06.2006
|
Жозе Мануел Барозо |
| |
Балканските земји, со исклучок на Романија и Бугарија, ги чека долг пат до членството во Европската унија, оцени претседателот на Европската комисија Жозе Мануел Барозо, во интервјуто за австрискиот весник „Клајне цајтунг“.
Тој потсети дека одлуката за прием на Бугарија и Романија во ЕУ е веќе донесена, додека за Хрватска нема противење за нејзино членство во јавноста на ЕУ.
Сепак, тој смета оти е подобро земјите од Западен Балкан еден ден да бидат примени во Унијата, отколку Унијата да одвојува огромни средства за воена стабилизизација на регионот.
Барозо посочи дека постои отпор за прием на Турција, појаснувајќи оти тоа мора да се прифати, како и тоа дека Турција е таа која бара пристапување, а не обратно.
„Ќе биде тешко да се преземат понатамошни чекори за проширување без решавање на прашањето за уставот. Потребен ни е нов правилник за институциите затоа што проширена ЕУ бара и поголема ефикасност, демократија и кохерентност“, нагласи Барозо.
Претседателот на ЕК предложи да остане отворено прашањето за евроуставот, а истовремено да се работи на конкретни проекти.
Барозо подвлече дека во ЕУ владее демократијата, во која големо внимание се посветува на мислењето на граѓаните, предупредувајќи сепак на опасноста од популизам, што според него, би бил кобен ако Европа одлуките за стратешките прашања ги носи врз основа на истражувања.
|