15.06.2006
18 зависници од дрога годинава починале чекајќи министерот Димов да ги отвори центрите за лекување, тврдат од невладината ХОБС. 500 семјства очајно чекаат нивните деца конечно да бидат ставени на третман за лекување во центарот во Кисела Вода.
Лути му се на министерот бидејќи предизборно ветил дека за еден месец ќе бидат отворени центрите во Скопје.
„18 лица кои што ХОБС ги има исконтактирано починаа чекајќи слободно место. Само во последниве шест месеци 122 корисници од Скопје побараа да им се помогне и да бидат ставени на третман. Од нив успеавме да сместиме само 16, а за останатите 106 не постојат слободни места“, изјави Влатко Деков, невладина организација ХОБС.
4 милиони долари доби Македонија од глобалниот фонд на ОН. Крајниот рок да се потрошат парите е до октомври.
Димов дури завчера побарал од градоначалникот Костовски на наредната седница да побара од општините да предложат локации. Невладините организации бараат да присуствуваат на седницата, во спротивно ќе протестирале пред влезот.
„Да се отворат под итно центрите во Скопје и да се престане со манипулација со оваа маргинализирана група. Не радува што во изјавите и тие личности од локалната управа, кои беа повикувани како противници на центрите, еве читаме дека не се против центрите“, рече Кети Тодорова невладина организација „Доверба“.
Невладините не ги знаат причините зошто досега не се отворени центрите кога за тоа постојат сите услови.
Револтирани се на двајцата министри Димов и Јакимовски кои пред две години се обврзаа дека ќе работат на лекување и ресоцијализација на зависниците, но ништо не направија.
На државата невладините и дадоа рок до октомври да си ги среди сметките. Во спротивно ќе го изгуби образот пред европа.
|