|
15.06.2006
Самитот на шефови на држави и влади на ЕУ е еден од најбесмислените досега и затоа му се заканува неуспех, оценува британскиот весник „Тајмс“.
Повикувајќи се на влијателни европски дипломати, весникот вели дека е грешка што 25 земји влегуваат во проект за заживување на Унијата по колапсот со отфрлениот устав, а притоа нема договор за начинот на кој би се реанимирала европската идеја.
Најголем проблем за надминување на растечката криза во Европската унија се гледа во францускиот претседател Ширак, кој нема да дозволи нов референдум за новиот Европски устав без разлика како тој ќе изгледа во иднина.
Се очекува на самитот Франција со поддршка на Холандија да побара повеќе време за размислување за иднината на европскиот устав.
Надежта сега е насочена кон Германија која од јануари ќе го преземе претседателство со унијата и која единствена би можела да посредува во компромис за иднината на Европа.
Претседателот на Европската Комисија свесен за се подлабоката криза во која влелгува унијата денеска побара поддршка од сите проевропски сили.
„Многу е важно сите релевнтни проевропски политички сили да работат заедно да излеземе од оваа ситуација на евро песимизам и да влееме доверба во европските проекти“, изјави Баросо претседател на ЕК.
Баросо предходно за германските медиуми изјави дека балканските земји со исклучок на Бугарија и Романија ги очекува долг пат до членство во унијата. Баросо смета дека е подобро еден ден балканот да влезе во унијата отколку унијата да дава огромни средства за воена стабилизација на регионот.
Западниот балкан и Србија ќе бидат една од темите за која денеска и утре ќе расправаат европските лидери.
|