Јосип Јовановиќ

За што ги трошат државните пари Агенцијата за странски инвестиции и Дирекцијата за слободни економски зони? Првата не донесе ниту еден странски инвеститор, а втората не отвори ниту една слободна економска зона.

Во последниве 18 месеци избега холандскиот ИНГ, „Хилтон“ ја изгуби битката уште пред да ја најде земјава на карта, „Џонсон контролс“ и „Сименс“, освен меморандум, не дадоа никакви гаранции дека ќе инвестираат во земјава.

А1 го праша првиот човек на Агенцијата за странски инвестиции, Виктор Делов, што сработивте во својот мандат.

„Анимираме компании, разговараме со менаџери кои се спремни и кои сакаат да привлечат странски инвеститор, меѓутоа на кој начин? Тие треба да знаат, тие треба да се одлучни, дали по основ на заедничко вложување со формирање на заедничка фирма, дали со докапитализација на веќе постоечка фирма“, изјави Виктор Делов, директор на Агенција за странски инвестиции.

„Значи, агенцијата како одговор на Агенција за привлекување на странски инвестиции, за правење на инвестиционата промоција, за овие година дена си го позиционираше својот статус во институциите на системот, се наметнуваше, проактивно делуваше, проактивно работеше, учествуваше во промотивни настани, во изработка на информативни пакети, на брошури, даваше сервис на инвеститори, така да ние направивме една добра база на податоци на потенцијали што се нудат на странски инвеститори, дали тоа се компании, дали тоа се локации“, вели Делов.

„Значи, од се ова што гледате, агенцијата го нема ексклузивитетот, но е дел од процесот“, додаде Виктор Делов.

И првиот човек на слободните економски зони Ракип Дочи се врти во круг. Од неговото доаѓање не е отворена ниту една зона, иако беа предвидени и „Бунарџик“ и „Прдејци“ и „Фени“. Постојано се зборува дека допрва ќе се направи инфраструктура.

„Странските компании можат лесно и брзо да почнат со бизнис во слободна економска зона, компаниите во зоната можат да бидат 100% локални, домашни или странски или со мешовит капитал“, рече Ракип Дочи, директор на Дирекцијата за слободни економски зони.

Овие институции постојат речиси две години, но нивното партизирање создаде јалови институции кои повеќе служат за задоволување на коалициските сметки, отколку за привлекување на познати брендови.

Поразителните резултати најдобро зборуваат за тоа.

Верзија за печатење

Прати по e-mail

Порака до авторот