|
| Судирот уследи по убиството на кашмирскиот сепаратистички лидер Абдул Гани Лоне |
|
| |
Индиските сили во текот на изминатата ноќ разменуваа спорадичен оган со пакистанските сили во спорната покраина Кашмир, а истовремено растат стравувањата од можен воен судир меѓу двете соседни земји.
Премиерот на Индија, Атал Бехари Ваџпаи се обидува со посета на немирната сојузна држава Џаму и Кашмир да ги смири напнатостите.
Овој судир уследи откако во вторникот беше убиен кашмирскиот сепаратистички лидер Абдул Гани Лоне.
Европската унија изрази длабока загриженост поради влошените односи меѓу Индија и Пакистан и ги повика двете земји да сторат се што е во нивна моќ да се избегнат натамошни судири.
Во името на 15-те земји членки на Унијата овој повик го упати Шпанија, како претседавач со ЕУ, откако вчера беше убиен кашмирскиот сепаратистички лидер.
Најновите терористички напади во близина на Џаму и во Кашмир, како и воените инциденти во изминатите 48 часови, можат да се сфатат и како сериозна закана, не само за народите на Индија и Пакистан, туку и за стабилноста на целиот регион, се вели во изјавата на Европската унија.
Поради затегнатата ситуација во регионот на Кашмир каде веќе неколку дена траат престрелки меѓу индиските и пакистанските сили, следната недела таму ќе отпатува британскиот министер за одбрана Џек Строу.
Според Строу, ова е криза којашто светот не може да ја игнорира, бидејќи можноста од избивање војна меѓу двете атомски сили е реална и многу вознемирувачка. За него ова е поопасен конфликт од оној на Блискиот Исток.
За следната недела во регионот е најавена и посета на еврокомесарот Крис Патен и на американскиот заменик министер за надворешни работи Армитејџ.
Вести поврзани со оваа
Најнови вести од Свет
|