Игор Манасиевски

„Во земјоделци и во оштетени ќе се инфилтрираат разни типови, кои немаат врска со земјоделско производство“

Новинарите се виновни за грешките што ги направило Министерството за земјоделство при распределбата на парите за поплавените.

Според министерот за земјоделство, Славко Петров, медиумскиот притисок сега е виновен што поплавените земјоделци, наместо десет, добија седум проценти од и онака малата финансиска помош.

Останатите пари, нешто повеќе од 20 илјади евра, по грешка отидоа во рацете на оние кои немаат ништо со земјоделството и поплавите.

„Брзајќи да ги платиме и притискајќи не дека земјоделците ги чекаат парите, во земјоделци и во оштетени ќе се инфилтрираат разни типови, кои ниту имаат врска со земја, нити имаат врска со земјоделско производство, ниту пак имаат било какви штети“, изјави министерот за земјоделство, шумарство и водостопанство Славко Петров. Три и пол месеци по поплавите, дури минатата недела поштарите ги разнесоа парите за помош на земјоделците. Голем дел од нив реагираа на пропустите во распределбата на сумите.

Министерот Славко Петров очекува дека до крајот на октомври, обештетувањето на земјоделците да достигне до 15% од проценетата штета, а допрва треба да се делат и парите собрани од солидарната дневница.

Верзија за печатење

Прати по e-mail