Даниела Михајловска Василевска

До македонските царински служби реагирале поголемите шпедиторски куќи

Камионџиите кои веќе еден месец со денови чекаа да ја минат македонската граница кај Блаце за влез на Косово, натоварени со свеж зеленчук и овошје, како и запаливи материјали, од изминатиов викенд се движат со многу побрзо темпо.

Иако проблемот е надминат, од македонската Царинска управа велат дека решението е само времено. Во моментов колоната камиони се движи побрзо само затоа што царинската администарција на УНМИК на косовска страна работи побрзо.

Оттука, колку долго ќе трае нивната добра воља да работат побрзо, толку време и нема да има проблем на границата кај Блаце, коментираат од македонската царина.

До македонските царински служби веќе реагирале и поголемите шпедиторски куќи, кои барале проблемот побрзо да се реши. На оваа тема реагираа и самите камионџии кои изјавуваа дека стоките што ги превезуваат веќе имаат изгубено од својата вредност.

И токму кога пробемот со царинската администрација на УНМИК се надмина, камионџиите се соочија со нова блокада на терминалот Стенковец, каде чекаат за влез на Косово.

Блокадата ја поставил коспоственикот на земјиштето што го користи Јавното претпријатие за стопанисување со станбен и деловен простор, Ефтим Исироф, бидејќи веќе една година не добил ниту денар за тоа што неговата земја се коритсти како терминал.

Верзија за печатење

Прати по e-mail