|
04.11.2002
Блискоисточните држави се поделени околу евентуален напад на САД врз Ирак. Додека Јордан и Саудиска Арабија предупредуваат дека агресивноста на САД поттикнува антиамерикански чувства кај Муслиманите, кувајтските власти се подготвуваат да го заштитат своето население во случај на војна во соседен Ирак.
„Агресивната политика на САД ги поттикнува антиамериканските чувства кај муслиманите“, изјави лидерот на најсилната јорданска партија на умерените муслимани, Шеик Хамза Мансур, кој смета дека доколку американската политика не се смири цената ќе биде огромна.
Менсур во интервјуто за „Ројтерс“ рече дека Американците со човечки животи ќе ја платат арогантната политика на својата влада.
Тој изрази надеж дека САД ќе извлечат поука од неодамнешните напади врз Американците, како и на туристичките места ширум светот.
„Саудиска Арабија нема да им дозволи на САД да ги користат нејзините бази и територија за евентуален напад врз Ирак со или без одобрение на Советот за безбедност на ОН“, изјави саудискиот министер за надворешни работи, Сауд ал-Фејсал.
Тој додаде дека тие ќе ја почитуваат одлуката на Советот и ќе соработуваат со него. Меѓутоа, Фејсал смета дека влегувањето во конфликт и употребата на објекти е нешто друго.
Кувајтските власти се подготвуваат да го заштитат своето население во случај на војна во соседен Ирак, а парламентот ги оцени преземените мерки како доволни за безбедност во внатрешноста и на границите на Кувајт.
Меѓу мерките е и онаа која ќе овозможи снабдување на населението со два милиони гас-маски по дисконтни цени, во случај Багдад да користи билошко или хемиско оружје.
Наредено е да се обезбедат и дополнителни количества вода, лекови и храна во продавниците.
Кувајтската армија вчера блокирала голем дел од северозападниот дел на земјата, каде што пристап имаат само американските трупи и војската.
Кувајт синоќа ја затвори локалната канцеларија на арапскиот сателитски канал Ал Џезира поради необјективност во известувањето.
„Причина е недостаток на професионализам и неутралност во третирањето на кувајтските проблеми“, соопшти претставник на кувајтската влада.
Ал Џезира има централна редакција во Катар и е една од најпопуларните телевизии во арапскиот свет. Својата светска слава ја стекна по емитувањето на видео пораките на Осама бин Ладен и останатите лидери на Ал Каида.
|