Две години од добивањето на решението за денационализација, фамилијата Пецеви се уште не го добила дуќанот во Струмица поради, како што велат, личната корист на корумпираните функционери. Фирмата „Југопромет“, што сега стопанисува со објектот, вели дека дуќанот не може да биде денационализиран бидејќи тие инвестирале во него и најавува дека нема намера да го враќа.

И двете страни го обвинуваат претседателот на Комисијата за денационализација Горан Трајковски.

Министерот за финансии Никола Груевски пред две години и предал на фамилијата Пецеви решение за денационализација, со кое во сопственост им се враќа дуќан во центарот на Струмица.

Но, со дуќанот и денеска стопанисува струмичката фирма „Југопромет“ по четирите неуспешни обиди на Пецеви да го преземат.

Виновни за тоа се членовите на Комисијата за денационализација. Овие државни службеници се корумпирани и затоа не' спречуваат да си го преземеме нашиот дуќан, обвинуваат наследниците.

Од друга страна, „Југопромет“, фирмата што во моментов го издава дуќанот под кирија, нема намера да им го отстапи на Пецеви, бидејќи според директорот Јордан Глигоров, денационализацијата на овој дуќан била извршена незаконски.

Во изјавата за А1 Глигоров вели дека дуќанот не може да биде предмет на денационализација бидејќи неговата фирма изградила дуќан од колибата што била национализирана пред педесетина години.

И Глигоров тврди дека претседателот на Комисијата за денационализација Горан Трајковски е виновен за овој спор меѓу наследниците на поранешниот сопственик и фирмата што сега стопанисува со дуќанот.

Трајковски за А1 изјави дека ако е донесен заклучок за извршување, дуќанот ќе биде присилно денационализиран, со асистенција на полицијата, но тоа ќе се случи откако судот, кој во меѓувреме се вмешал во спорот, ќе донесе конечна одлука.

Верзија за печатење

Прати по e-mail