Наташа Стојановска

„Сосема е јасно дека се работи за една шпекулативна приватизација“

Се засилува фронтот против продажбата на ЕСМ Дистрибуција. 30 партии од опозицијата побараа од Владата итно стопирање на продажбата. Потпишаа декларација со која се обврзуваат ЕСМ да не смее да се продава во наредните четири години.

„Сосема е јасно дека се работи за една шпекулативна приватизација, полна со коруптивни методи. И брзањето и прашањето на роковите исто така водат кон тоа. Затоа ние се собравме денеска, да извршиме дополнителен притисок“, изјави Никола Груевски, претседател на ВМРО-ДПМНЕ.

Декларацијата ја потпиша и ВМРО-Народна партија, ама не се согласува со ставот ЕСМ да не се продава во наредните четири години. Бараат продажбата да биде стопирана до влезот на земјава во Европската Унија.

„За жал, од предлагачот нашата забелешка не беше прифатена. Ние во знак на добра волја сепак се согласивме да ставиме потпис на декларацијата“, рече Јован Андоновски, ВМРО-НП.

Четирите компании кои влегоа во трка за Дистрибуцијата побараа одложување на рокот до кога треба да ги достават своите финансиски понуди.

Наместо на први, понудите да ги дадат на 15 март. Им требало дополнително време, оти доцна ги добиле завршните финансиски извештаи за минатата година.

Веќе е извесно дека Владата ќе дозволи пролонгирање на овој рок. Официјално, одлуката ќе биде донесена на идната владина седница.

Верзија за печатење

Прати по e-mail