Taurarin ‘yan wasan Afirka

…kuma abin koyi ne

Sa’ilin da zaben shugaban kasa na Cote d’Ivoire ya janyo rigima da zubar da jini a kan tituna, Didier Drogba ya kaddamar da gangamin fadakarwa ta gidajen jaridu ta hanyar baiwa rigima jan kati. Ya kuma garzaya Jamus domin goyon bayan kirkiro da asusun agaji ga mabukata a bukin ban-kwana ga Michael Ballack a Leipzig, ranar 05.Juni 2013.

Taurarin ‘yan wasan Afirka

Dan gudun tsere kuma dan siyasa

Wesley Korrir, dan wasan guje-guje ne da ke da ra’ayin Siyasa. Shi ne zakaran tsere na Boston a 2012, kuma an zabe shi mukaddashin shugaban majalisar dokokin Kenya a watan Maris na 2013, kana yana wakiltar Cherangani. Amma ban yi watsi da harkar wasa ba. An dama da shi a tseren Boston na bana in da ya zo na biyar gabannin hare-haren da suka dakushe armashin gasar.

Taurarin ‘yan wasan Afirka

Daya daga cikin fitattun 'yan wasan kwando

Marigayi Manute Bol ya rikida zuwa dan siyasa. Fitaccen dan wasan kwallon kwandon, wanda tsawonsa ya kai mita 2 da centimita 31 ya yi Allah wadai da yakin da a ke yi a kasarsa Sudan sa’ilin jerin gwanon da a ka yi a Philadelphia. Ta hanyar gidauniyarsa ta Ring True, ya tattara agaji ga ‘yan gudun hijirar Sudan. A yanzu gidauniyar na taimakon sha’anin ilimi ga ‘yan wasan Afirka.

Taurarin ‘yan wasan Afirka

Mace mai kamar maza a fagen wasannin Afirka...

Ba za a taba mantawa da Nawal El Moutawakel, ‘yar kasar Morokko ba. A gasar Olympic na 1984 a Los Angeles, ta zama zakara a tseren mita 400, inda ta zama mace Musulma ‘yar Afirka da ta fara lashe lambar zinare a gasar Olympic.

Taurarin ‘yan wasan Afirka

...daga nan kuma sai ta fara aiki da Kwamitin Olympic na duniya

Shekaru 29 bayan haka, Nawal El Moutawakel, ta zama mataimakiyar shugaban Kwamitin Olympic na Duniya. Tana kuma taka rawar gani wajen shirya gasar Olympic ta 2016 a Rio kuma ta gana da Pele, shahararren dan wasan kwallon kafar Brazil. Har yanzu El Moutawakel shahararriya ce a kasarta ta gado Morokko.

Taurarin ‘yan wasan Afirka

Cin kwallo wa Kamaru...

Shahararren dan wasan Roger Milla ya yi bajinta a gasar cin kwallon kafa ta duniya ta 1990 a Italiya. Kwallon da ya ci ya sa Kamaru zama kasar Afirka ta farko da ta tsallake zagaye na biyu a gasar cin kofin duniya. Ya yi rawa bayan duk wani kwallon da ya ci.

Taurarin ‘yan wasan Afirka

...yana kuma taimaka wa wasu

Roger Milla na amfani da shahararsa wajen goyon bayan ayyuka na-gari. A 2001, ya zama dan Afirka na farko da a ka zaba a matsayin jakada ga hukumar Majalisar Dinkin Duniya da ke yaki da cutar AIDS.

Taurarin ‘yan wasan Afirka

Taimaka wa na baya

‘Yar wasan guje-guje da tsalle-tsallen da ta yi fice a tseren mita 800, Maria de Lurdes Mutola ta lashe zinare a gasar duniya sau uku da kuma a Olympic. A kasarta Mozambik kuwa, tana taimaka wa matasa da ke da basira ta fannin wasa ta hanyar gidauniyarta mai suna Lurdes Mutola, kana tare da tallafin UNICEF, tana shawo kan Iyaye su yi wa ‘ya’yansu riga-kafin cutar shan-Inna da kyanda.

Taurarin ‘yan wasan Afirka

Wani hanin ga Allah baiwa ce

A birnin Salt Lake a 2002, Isaac Menyoli ya zama dan wasan Kamaru na farko da ya shiga aka dama da shi a gasar tseren kankara. Shi ne kashin baya a gasar ta kilomita 15. Sai dai bai shiga da niyyar zama zakara ba, amma don ya janyo hankula ga cutar AIDS a kasarsa. Ya yi hakan ne ta hanyar hira da manema labarai jim kadan bayan gasar, wadda in ba don Olymypics ba, da bai sami wannan dama ba.

Mawallafi: Nadina Schwarzbeck / Saleh Umar Saleh | Edita: ZMA