امریکا میں سمندری طوفان سینڈی کا زور ٹوٹ گیا ہے مگر یہ طاقتور طوفان اپنے پیچھے تباہی اور بربادی کی ایک داستان چھوڑ گیا ہے۔ جزائر غرب الہند، کینیڈا اور امریکا میں اس طوفان کے باعث مجموعی طور پر ایک سو سے زائد افراد ہلاک ہوئے۔ امریکا کے تجارتی مرکز نیویارک میں سینڈی طوفان کے باعث ٹرانسپورٹ اور بجلی کا نظام مفلوج ہوکر رہ گیا ہے۔ طوفان کے سبب امریکا میں بیالیس اور محض نیویارک میں اٹھارہ افراد مارے گئے۔ نیویارک میں نکاسی آب کا نظام تباہ ہوکر رہ گیا ہے جبکہ کئی اہم شاہراہیں پانی میں ڈوبی ہوئی ہیں۔ نیویارک اور جرسی کے لاکھوں باسی بجلی سے محروم ہو گئے۔ نیویارک کے ناظم اعلیٰ مائیکل بلومبرگ کے بقول طوفان کے ساتھ چلنے والی انتہائی تیز رفتار ہواؤں سے بھی بڑی تباہی پھیلی۔ صدر باراک اوباما نے بین الاقوامی ہلال احمر کے دفتر میں طوفان کے بعد راحت کاری کے کاموں کا جائزہ لیا۔ انہوں نے متاثرہ شہریوں کی ہمت باندھتے ہوئے کہا کہ امریکا اس مشکل وقت میں ان کے ساتھ ہے۔ ماہرین موسمیات نے متبنہ کیا ہے کہ اگرچہ طوفان کا زور ٹوٹ چکا ہے تاہم سیلابی ریلوں سے اب بھی محتاط رہنے کی ضرورت ہے۔
شام کے سرکاری ذرائع ابلاغ کے مطابق مسلح دہشت گردوں نے فضائیہ کے ایک جنرل کو ہلاک کر دیا ہے۔ سرکاری ٹی وی کے مطابق جنرل عبد اللہ محمود الخالدی کو دارالحکومت کے رکن الدین نامی ضلع میں نشانہ بنایا گیا۔ حکومت مخالف باغیوں کے مطابق جنرل عبد اللہ ان کے خلاف فضائی کارروائیوں کے احکامات دینے والوں میں شامل تھے۔ دمشق سے موصولہ اطلاعات کے مطابق شہر کے نواحی علاقوں میں فضائیہ کی بمباری جاری ہے۔ اطلاعات کے مطابق دمشق میں فلسطینی مہاجرین کے کیمپ یرموک میں بھی صدر بشار الاسد کے حامیوں اور مخالفین میں جھڑپ ہوئی ہے۔ شام میں قیام امن کی سفارتی کوششوں کے سلسلے میں اقوام متحدہ کے خصوصی مندوب لخضر براہیمی روس کے بعد چین پہنچ چکے ہیں۔ دریں اثنا ترکی نے براہیمی کے سفارتی مشن کو مسترد کر دیا ہے۔ وزیر خارجہ احمد داؤد اوغلو کے مطابق ایسی حکومت سے مذاکرات کا کوئی فائدہ نہیں جو اپنے شہریوں کا قتل عام جاری رکھے ہوئے ہے۔
سینڈی طوفان کے باعث امریکی صدارتی انتخابات کی معطل شدہ مہم بظاہر دوبارہ زور پکڑتی دکھائی دے رہی ہے۔ صدر باراک اوباما آج نیوجرسی کے ڈیموکریٹ گورنر کے ساتھ متاثرہ علاقوں کا دورہ کریں گے۔ اگرچہ یہ بظاہر امدادی کاموں کا جائزہ لینے کی کوشش ہے مگر ناقدین اس میں سیاسی عنصر چھپا دیکھتے ہیں۔ نیوجرسی کے 50سالہ گورنر کرس کرسٹی کو مستقبل میں ڈیموکریٹ صدارتی امیدوار کے طور پر دیکھا جاتا ہے۔ وہ طوفان کے بعد مرکزی حکومت کے اقدامات کی بھرپور انداز میں تعریف کرچکے ہیں۔ دوسری جانب ری پبلکن صدارتی امیدوار مٹ رومنی بھی متاثرین کی بحالی میں خاصے سرگرم ہیں۔ انہوں نے ریاست اوہایو میں شیڈیول انتخابی جلسے کو متاثرین کے لیے چندہ جمع کرنے کی مہم میں بدل ڈالا اور یہ تاثر رد کیا کہ اس کے پیچھے سیاسی مقاصد کار فرما ہیں۔
افغانستان میں پولیس کی وردی میں ملبوس ایک شخص نے دو غیر ملکی فوجیوں کو ہلاک کر دیا ہے۔ یہ واقعہ جنوبی صوبے ہلمند میں پیش آیا، جہاں دو برطانوی فوجی مارے گئے۔ ہلمند کے گورنر محمد نعیم بلوچ نے اس واقعے کی تصدیق کر دی ہے۔ طالبان کے ایک ترجمان کے مطابق حملہ آور ان کا ساتھی تھا۔ رواں برس اس قسم کے حملوں میں پچاس سے زائد غیر ملکی فوجی مارے جا چکے ہیں۔ ان داخلی حملوں میں ایک ایسے وقت میں اضافہ دیکھا جا رہا ہے، جب نیٹو فوجی مشن 2014ء میں اختتام پذیر ہو رہا ہے اور غیر ملکی فوجی سکیورٹی کے انتظامات افغان فورسز کے حوالے کرنے کے مرحلے میں ہیں۔ امریکی وزیر دفاع لیون پنیٹا کے بقول افغانستان میں کامیابی کے لیے اہم ہے کہ اس طرح کے حملوں کو روکا جائے۔
پاکستان نے اقوام متحدہ کی ہیومن رائٹس کونسل میں اپنے یہاں انسانوں کے حقوق کا تحفظ کرنے کا عزم دہرایا ہے۔ وزیر خارجہ حنا ربانی کھر نے جنیوا میں کونسل کے اجلاس سے خطاب میں کہا کہ پاکستان منصفانہ معاشرتی اقدار پر یقین رکھتا ہے۔ اجلاس میں شریک مغربی سفارتکاروں نے الزام عائد کیا کہ پاکستان میں اقلیتیوں کا استحصال کیا جاتا ہے، منحرفین کے خلاف فوجی کارروائی کی جاتی ہے، خواتین اور بچوں کے ساتھ نا انصافی ہوتی ہے اور انسانی تجارت بھی ایک شدید مسئلہ ہے،جس پر قابو پانے کے لیے انتہائی کم اقدامات اٹھائے گئے ہیں۔ امریکی سفیر آئلین ڈنہاؤ نے اس ضمن میں بالخصوص بلوچستان میں فوجی آپریشن کا ذکر کیا۔ انہوں نے کہا کہ اسلام آباد حکومت کو یقینی بنانا چاہیے کہ ماورائے عدالت قتل کی وارداتوں، تشدد کرنے والوں اور لوگوں کو خفیہ طور پر اغوا کرنے والوں کو انصاف کے کٹہرے میں لایا جائے۔
میکسیکو کے ایک شہری نے امریکی سرحدی محافظ کے قتل کا اعتراف کرلیا ہے۔ 2010ء میں ہوئے قتل کا یہ واقعہ اس متنازعہ امریکی منصوبے سے متعلق ہے، جس کے ذریعے میکسیکو کے منشیات فروشوں کو جان بوجھ کر اسلحہ فراہم کیا گیا تھا تاکہ غیر قانونی اسلحے کا لین دین کرنے والوں کی شناخت ہوسکے۔ یہ منصوبہ اس لیے بھی متنازعہ بنا کیونکہ ہزاروں کی تعداد میں خود کار ہتھیار جرائم پیشہ افراد کو فراہم کرنے کے باوجود کوئی بھی اہم مجرم گرفتار نہیں ہوسکا تھا ۔ امریکی ریاست ٹکسن میں سرحدی محافظ کے قتل کا اعتراف کرنے والے شخص کو استغاثہ نے موت کی سزا نہ دینے کا یقین دلایا ہے۔ اسی بنیاد پر اس نے اپنا جرم قبول کیا ہے۔ سرحدی محافظ برائن ٹیری کو ریاست ایریزونا میں قتل کیا گیا تھا۔
جرمن پولیس نے مراکش میں تیس سے زائد افراد کے قتل میں مشتبہ طور پر ملوث شخض کو گرفتار کر لیا ہے۔ فرانس کی شہریت رکھنے والا یہ37 سالہ شخص بنیادی طور پر مراکشی سے تعلق رکھتا ہے۔ مراکش کے شہر الدار البیضا (کاسابلانکا) میں 16 مئی 2003ء کو دس سے زائد خودکش حملہ آوروں نے خود کو دھماکے سے اڑا دیا تھا۔ سیاحوں کے لیے مشہور اس علاقے میں پیش آنے والے اس واقعے میں حملہ آوروں کےساتھ 45 افراد مارے گئے تھے۔ گرفتار شدہ شخص اسی واقعے میں مراکش کو مطلوب تھا۔ جرمن پولیس کے مطابق اس شخص کو جنوبی شہر میونخ کے ہوائی اڈے سے اس وقت گرفتار کیا گیا جب وہ اہل خانہ کے ہمراہ دبئی جانے والا تھا۔
اٹلی کی پارلیمان نے انسداد بدعنوانی سے متعلق ایک بل کو اعتماد کا ووٹ دے دیا ہے۔ یہ بل حکومت کی جانب سے پیش کیے گئے سابقہ بل کا قدرے نرم نعم البدل ہے۔ یہ بل ایسے وقت میں منظور ہوا ہے جب یورپی یونین یں اٹلی کے سیاست دانوں کی ساکھ خاصی متاثر دکھائی دیتی ہے۔ تنازعات میں گھرے سابق وزیر اعظم بیرلسکونی کے برعکس موجودہ وزیر اعظم ماریو مونٹی اصلاحاتی کے عمل کو زیادہ تیز کرنے کی کوشش میں دکھائی دیتے ہیں۔ پارلیمان سے منظور شدہ قانون کے تحت بدعنوان ثابت ہونے والے سرکاری افسران اور سیاست دان سرکاری عہدہ نہیں رکھ سکیں گے، ان کی قید کی مدت بڑھا دی جائے گی۔
شمال افریقی ملک تیونس میں سخت گیر اسلامی نظریات کے حامل سلفی مظاہرین اور پولیس کے مابین جھڑپوں میں ایک شخص ہلاک ہو گیا۔ سکیورٹی ذرائع کے مطابق سلفی مظاہرین نے دارالحکومت تیونس میں پولیس اسٹیشن پر حملہ کیا تھا۔ پولیس کی جوابی کارروائی میں ایک شخص ہلاک ہوا ہے۔ حال ہی میں عرب دنیا میں انقلاب کا آغاز تیونس ہی سے ہوا تھا۔ یہاں پر مذہبی رجحانات کی حامل جماعتوں کے اتحاد النہضہ کی حکومت ہے، جو سخت گیر نظریات کی مخالف ہے۔ حکومت میں شامل سخت گیر مؤقف کی حامل جماعتیں الکحل پر پابندی، خواتین کے حجاب اور شرعی قوانین کے اطلاق کا مطالبہ کر رہی ہیں۔ حکومت میں شامل متعدل نظریات کی حامل قوتیں اس قسم کے اقدامات کی مخالف ہیں۔ تیونس فرانس کی نوآبادی رہا ہے اور اسے دیگر عرب ریاستوں کے مقابلے میں زیادہ آزاد خیال ملک تصور کیا جاتا ہے۔
افریقی ملک نائجیریا میں مسلح ڈاکووں نے فائرنگ کرکے بیس افراد کو ہلاک کر دیا ہے۔ نائجیریا کا زامفارا نامی متاثرہ صوبہ طویل عرصے سے لاقانونیت اور بدامنی کا شکار ہے۔ حکومتی ذرائع کے مطابق ڈاکووں کے اس گروہ نے دیہات میں گھس کر بلا امتیاز فائرنگ کی تھی۔ بتایا جارہا ہے کہ ان مسلح افراد نے فائر بند کرنے کی اپیل کرنے والے مقامی رہنما کو بھی قتل کر ڈالا اور پھر تمام گھروں سے نقدی اور قیمتی سامان لے کر فرار ہوگئے۔ اسی صوبے میں تین ماہ قبل میں اسی قسم کے ایک واقعے میں 23 دیہاتیوں کو قتل کرکے لوٹ مار کی گئی تھی۔ واضح رہے کہ نائجیریا میں بوکو حرام نامی اسلامی عسکریت پسند گروہ بھی فعال ہے۔
بھارتی کرکٹ بورڈ نے پاکستان کو دسمبر میں دورہ کرنے کی منظوری دے دی ہے۔ پریس ٹرسٹ آف انڈیا کے مطابق اس دورے میں تین ایک روزہ اور ایک ٹوئنٹی ٹوئنٹی میچ کھیلا جائے گا۔ بتایا گیا ہے کہ بھارتی کرکٹ نے ملکی وزیر داخلہ آر کے سنگھ کے ساتھ سلامتی سے متعلق امور پر بات چیت کے بعد اس دورے کی منظوری دی ہے۔
سائیکلنگ کی دنیا کے بدنام زمانہ سابق چمپیئن لانس آرمسٹرانگ سے آسٹریلوی شہر ایڈیلیڈ کی اعزاز کنجی واپس لے لی گئی ہے۔ سات بار ٹور ڈی فرانس کو جیتنے والے اس امریکی سائیکل پر ممنوعہ طاقت بخش ادویات کا استعمال ثابت ہوچکا ہے۔ جرم ثابت ہونے کے بعد آرمسٹرانگ سے تمام اعزازات واپس لے لیے گئے ہیں اور آج کل وہ انعامی رقم سمیت دیگر مالی تنازعات میں الجھے ہوئے ہیں۔ ایڈیلیڈ شہر شہر کے کونسلروں نے ایک اجلاس کے بعد ان سے اعزاز کنجی واپس لینے کا فیصلہ کیا۔