خبریں

یورپی مرکزی بینک نے اُس اخباری رپورٹ کی تردید کر دی ہے، جس میں کہا گیا تھا کہ یونان کو اپنے بجٹ کو متوازن بنانے اور سرکاری قرضوں سے چھٹکارے کے لیے دو سال کا مزید وقت مل گیا ہے۔ یہ خبر جرمن اخبار ز‍ُوڈ ڈوئچے سائٹنگ نے اپنی آج کی اشاعت میں یونان کو قرضہ فراہم کرنے والے عالمی فریقین کے ساتھ طے شُدہ معاہدے کے حوالے سے دی ہے۔ اخبار کا کہنا تھا کہ یونان کو نئے قرضوں کی حد کو یورپی یونین کی مقرر کردہ حد یعنی اپنی مجموعی ملکی پیداوار کے تین فیصد سے کم تک لانے کے لیے 2014ء کی بجائے 2016ء تک کی مہلت دے دی گئی ہے۔

آج پاکستانی قبائلی علاقے شمالی وزیرستان میں کیے جانے والے ایک ڈرون حملے میں تین افراد ہلاک ہو گئے۔ مقامی سکیورٹی حکام کے مطابق ایک امریکی ڈرون طیارے سے شمالی وزیرستان کے مرکزی شہر میران شاہ سے بیس کلومیٹر مشرق کی جانب ٹاپی کے علاقے میں ایک گھر پر ایک میزائل داغا گیا۔ دوسرے میزائل سے اس گھر کے باہر پارک کی گئی ایک گاڑی کو نشانہ بنایا گیا۔ پشاور سے ایک سکیورٹی اہکار نے کہا کہ یہ حملہ عسکریت پسندوں کے ایک کمپاؤنڈ پر کیا گیا اور یہ کہ مرنے والے عسکریت پسند تھے۔ اس طرح رواں مہینے میران شاہ کے علاقے کو تیسری مرتبہ کسی ڈرون حملے کا نشانہ بنایا گیا ہے۔

رواں برس 20 لاکھ سے زائد افراد فریضہء حج کی ادائیگی کے لیے سعودی عرب کے شہر مکہ پہنچے ہیں، جہاں آج سے حج کا باقاعدہ آغاز آج ہو رہا ہے۔ سعودی حکومت کی جانب سے حج کے دوران حادثات اور خیموں میں آگ لگنے کے واقعات کی روک تھام کے لیے خصوصی حفاظتی انتظامات کیے گئے ہیں۔ سن 2006ء ميں 364 حاجی مکہ سے منیٰ کو جانے والے راستے ميں ايک پل کے قريب کچلے جانے سے ہلاک ہو گئے تھے۔ حالیہ مہینوں میں سعودی عرب نے بنیادی ڈھانچے اور حج کو زیادہ آرام دہ اور محفوظ بنانے کے لیے تقریباً 220 ملین ڈالر کی سرمایہ کاری کی ہے۔ حج اسلام کا پانچواں اہم ترین رکن ہے، جو ہر صاحب استطاعت مسلمان پر زندگی میں ایک مرتبہ فرض ہے۔

اسرائیلی فضائی کارروائی کے نتیجے میں غزہ پٹی میں مرنے والے فلسطینیوں کی تعداد کم از کم چار ہو گئی ہے جبکہ دَس افراد زخمی ہوئے ہیں۔ فلسطینی نیوز ایجنسی سافا نے بتایا ہے کہ آج علی الصبح اس ساحلی علاقے کے جنوب میں رفاہ کے مقام پر عسکریت پسند فلسطینیوں کے ایک گروپ کو نشانہ بنایا گیا اور یہ کہ اس حملے میں ایک شخص ہلاک اور ایک زخمی ہو گیا۔ ایک رات پہلے غزہ پٹی کے شمال میں کیے جانے والے ایک اسرائیلی حملے میں دو عسکریت پسند فلسطینی ہلاک ہوئے جبکہ تیسرا بعد ازاں اپنے زخموں کی تاب نہ لاتے ہوئے چل بسا۔ تشدد کے یہ تازہ واقعات ایک ایسے وقت ہو رہے ہیں، جب یورپی یونین کے خارجہ امور کی سربراہ کیتھرین ایشٹن آج یروشلم میں اسرائیلی قیادت کے ساتھ بات چیت کر رہی ہیں اور کل جمعرات کو فلسطینی صدر محمود عباس کے ساتھ ملاقات کرنے والی ہیں۔

سوڈانی وزیر اطلاعات کے مطابق دارالحکومت خرطوم میں ایک روز قبل اسلحے کی ایک فیکٹری میں دھماکوں اور بڑے پیمانے پر آگ لگنے سے پہلے چار فوجی طیاروں نے اس پر حملہ کیا تھا۔ وزیر احمد بلال عثمان نے صحافیوں کو بتایا کہ یرمُوک نامی اس پلانٹ پر حملہ کرنے والے طیارے مشرق کی سمت سے آئے تھے اور یہ کہ اس حملے کے پیچھے اسرائیل کا ہاتھ معلوم ہوتا ہے۔ سوڈانی وزیر نے دھمکی دی کہ سوڈان جوابی کارروائی کا حق محفوظ رکھتا ہے۔

جرمن چانسلر انگیلا میرکل نے آج دارالحکومت برلن میں نازی دَور میں ہلاک ہونے والے تقریباﹰ پانچ لاکھ روما باشندوں کے لیے ایک یادگار کا افتتاح کیا۔ ایک گول حوض کی شکل کی اس خصوصی یادگار کا طویل عرصے سے انتظار کیا جا رہا تھا۔ اس حوض  میں روزانہ ایک تازہ پھول رکھا جائے گا۔ یہ یادگار پارلیمنٹ کی عمارت کے سامنے بنائی گئی ہے۔ آج کی تقریب میں نازی دَور کے مظالم سے بچ جانے والے ایک سو سے زیادہ افراد کے ساتھ ساتھ سنتی اور روما کی مرکزی کونسل کے چیئرمین رومانی روز بھی شریک ہوئے۔ اسرائیلی فنکار ڈانی کاراوان کی تیار کردہ اس یادگار پر 2.8 ملین یورو لاگت آئی ہے۔

ملبوسات کا کاروبار کرنے والی جرمن کمپنی KiK پاکستانی شہر کراچی میں ملبوسات تیار کرنے والی ایک فیکٹری میں آتشزدگی کے دوران ہلاک ہونے والے افراد کے لواحقین کو 1.2 ملین ڈالر سے زیادہ کی زرِ تلافی دینے پر راضی ہو گئی ہے۔ نیشنل ٹریڈ یونین فیڈریشن کے سربراہ ناصر منصور کے مطابق اُن کی تنظیم نے اس جرمن کمپنی کو معاوضے کی ادائیگی پر مجبور کیا ہے۔ ستمبر میں کراچی کی علی انٹرپرائز کمپنی میں آگ لگنے سے 289 افراد ہلاک اور 110 زخمی ہو گئے تھے۔ اس فیکٹری میں KiK کے لیے جینز تیار کی جاتی تھیں۔

کمپیوٹر کمپنی ایپل نے اپنا نیا آئی پیڈ لانچ کر دیا ہے، جو قبل ازیں پیش کیے گئے آئی پیڈز کے مقابلے میں چھوٹا ہے، اسی لیے اسے آئی پیڈ مِنی کا نام دیا گیا ہے۔ ایپل نے یہ نئی پراڈکٹ کیلی فورنیا کے شہر سان ہوزے میں منگل کو ایک خصوصی تقریب میں متعارف کروائی۔ اس موقع پر کمپنی کے سینئر نائب صدر فِل شِیلر کا کہنا تھا کہ نہ صرف آئی پیڈ کو چھوٹا کر دیا گیا بلکہ اس کا ڈیزائن بھی پوری طرح نیا ہے۔ آئی پیڈ مِنی کا اسکرین سائز 7.9 انچ ہے جبکہ اس سے قبل پیش کیے گئے آئی پیڈ کا سائز 9.7 انچ ہے۔

جیمز بانڈ سیریز کی نئی فلم اسکائی فال کا ورلڈ پریمیئر منگل کی شب لندن میں ہوا، جس میں برطانوی شہزادہ چارلس بھی شریک ہوئے۔ اسکائی فال اس سیریز کی فلموں کے گولڈن جوبلی سال میں ریلیز کی جا رہی ہے اور یہ اس سیریز کی 23 ویں فلم ہے۔ اس فلم کا ورلڈ پریمیئر لندن کے رائل البرٹ ہال میں ہوا۔ اس موقع پر شہزادہ چارلس کے ساتھ فلمی دنیا کی متعدد اہم  شخصیات بھی موجود تھیں۔ یہ فلم برطانیہ میں 26 اکتوبر کو عام نمائش کے لیے پیش کر دی جائے گی۔ جرمن شائقین یکم نومبر سے یہ فلم دیکھ سکیں گے۔

بنگلہ دیشی ٹیم رواں برس دسمبر میں پاکستان کا دورہ کرے گی۔ بنگلہ دیش کرکٹ بورڈ BCB کے مطابق اس دوران تین وَن ڈے میچوں کے علاوہ دو ٹوئنٹی ٹوئنٹی میچز بھی کھیلے جائیں گے۔ میڈیا رپورٹوں کے مطابق BCB کے سربراہ آج اس دورے کا باقاعدہ اعلان کرنے والے ہیں۔ بنگلہ دیشی ٹیم رواں برس اپریل میں ایک مختصر سیریز کے لیے  پاکستان کا دورہ کرنے والی تھی تاہم ملکی ہائی کورٹ کے حکم پر سکیورٹی خدشات کی وجہ سے معطل کر دیا گیا تھا۔ سن 2009ء میں سری لنکن ٹیم پر حملے کے بعد سے غیر ملکی ٹیمیں پاکستان آنے سے گریز کرتی آئی ہیں۔